هنعمل ايه في أزمة التضخم؟

في هذه الكبسولة العقارية السريعة أوضح لك تفاصيل هنعمل ايه في أزمة التضخم؟

هنعمل ايه في أزمة التضخم؟

كل اقتصاد في الدنيا لما بيواجه أزمة بياخد اجراءات تصحيحية عشان يقاوم الأزمة ويخفف تأثيرها .. ودور البياع إنه يفهم الأزمة كويس .. عشان يقدر يطور الحلول ليها .. 

العالم كله بيواجه أزمة اقتصادية كبيرة بسبب التضخم الي حاصل بسبب زيادة الأسعار .. بداية من ارتفاع سعر الوقود في العالم وأزمة سلاسل الإمداد .. وبعدها الحرب الدايرة بين روسيا وأوكرانيا .. من أكبر مصدرين الوقود والغذاء في العالم .. وبالتالي زادت الأسعار بشكل كبير على كل المستويات .. 

 

المؤسسات المالية في مصر .. خدت أكتر من إجراء: 

- البنك المركزي المصري .. رفع سعر الفائدة ١٪ على الإقراض والاقتراض .. وده معناه سحب السيولة من السوق .. وبالتالي نقص ضخ فلوس المصريين في المشاريع الجديدة والاستهلاك بشكل عام .. وتشجيع المصريين إنهم يحطوا فلوسهم في البنك 

- البنوك المصرية أصدرت شهادات بتوصل فايدتها لـ 18% وده بهدف زيادة الودائع في البنوك وبالتالي جذب رئوس أموال داخلية وخارجية .. وبالتالي بيدي الحكومة القدرة على زيادة الاستدانة الداخلية لاستكمال برنامج الإصلاح 

- وزارة المالية بتزود القيود على الاستيراد وبالتالي بتقلل من شراء العملات الأجنبية وده هيزود من إقبال المستهلكين على السلع المحلية بشكل أكبر وخفض قيمة الجنيه هيزود من فرص الصادرات المصرية 

- وزارة المالية بتحاول بحزمة قرارات من الدعم وخفض الضرايب على التعاملات في البورصة زيادة رئوس الأموال الأجنبية وأدوات الاستدانة الخارجية 

 

ايه أثر ده على عملاء العقارات؟

 

باختصار .. عميل العقارات هو واحد من ٣ .. إما هو موظف براتب كبير .. أو صاحب بيزنيس .. أو صاحب رأس مال كبير من مكافأة أو ورث .. 

 

الـ ٣ حصلهم تأثير كبير بسبب الأزمة الحالية .. 

الموظفين .. حاسين بتهديد مرتباتهم وانخفاض قيمتها .. 

أصحاب البيزنيس .. حاسين بتهديد نشاطهم التجاري وهيكون تركيزهم أكتر على أنشطتهم التجارية وازاي ينقذوها في ظل الأزمة

أصحاب رأس المال .. هتزيد احتمالية اهتمامهم أكتر بالإيداع في البنوك 

 

ده معناه ايه؟ 

 

ده معناه باختصار انخفاض مبيعات العقارات عموما .. وفي العاصمة الإدارية خصوصا .. لإن عقار العاصمة بيعتبر بنسبة كبيرة استثمار جانبي لعميل العقارات .. ومع الي بيحصل هيحصل انخفاض حاد في مبيعات العاصمة أكتر من غيرها .. لإن لما بتحصل أي أزمة العملاء بتدخل في مرحلة إعادة ترتيب الأولويات .. وسعتها هيكون الاستثمار الجانبي في العاصمة هو اختيار أقل من حيث الأهمية.

 

امال مين الي هيشتري عقارات؟ 

من الي قلناه .. الي شايف العقار في قمة أولوياته .. وده نوعين .. عميل الفوري .. والعميل الي عارف إنه محتاج العقار بشكل كبير في خطته الشخصية .. والعميل الي خايف على نقص قيمة فلوسه .. 

 

يبقى المفروض نعمل ايه؟ 

 

هنقسم النصايح لأكتر من مستوى .. مستوى المطورين .. مستوى إدارة التسويق والمبيعات .. مستوى البياعين 

 

على مستوى المطورين: 

- بطبيعة الحال الشركة مضطرة ترفع الأسعار .. بسبب ارتفاع أسعار مواد البناء وتقدر تلتزم بالجدول الزمني لمشروعاتها .. لكن لازم تراعي الي بيحصل لعميلك .. عشان كده لازم تقدم عروض لعملائك عشان تضمن استمرار مبيعاتك .. وده عن طريق تخفيض المقدم والأقساط ومد أنظمة السداد .. لإن انخفاض المقدم بيحرك العميل للشراء والقسط يعتبر أكبر هم عنده .. لكن في نفس الوقت لازم تحاول الحصول على مقدمات تساهم في زيادة الكاش عندك عشان تقدر تواجه الأزمة من ناحية التسويق والمبيعات ومن ناحية الإنشاءات 

 

- لازم تكون مرن أكتر في التعامل مع عملائك بطرح أنظمة مختلفة للسداد وتزود من الاستثناءات عشان تقدر تتعامل مع شرائح أكتر من عملائك على قد ما تقدر وتقلل من اعتراضاتهم .. وتقدملهم ضمانات أكتر في عقودك خصوصا فيما يتعلق بالتأخير من عندك أو من عندهم 

 

- متدخلش مشاريع جديدة في الفترة الحالية .. وركز كل مواردك على المشاريع الحالية الي انت شغال عليها .. وظبط تدفقاتك النقدية على أساس التزاماتك .. وفي وجهة نظري لازم الدولة تتدخل في إعادة جدولة أقساط الأراضي عشان تخف الضغط على المطورين 

 

- لازم تطور من استراتيجيتك في التسويق والمبيعات لإن عميلك طبيعته اتغيرت بسبب الأزمة .. وغالبا هتضطر تكلم عميل في شريحة أعلى وده الي هنوضحه أكتر لما نتكلم عن التسويق والمبيعات .. الجنيه الي هتصرفه على تطوير التسويق والمبيعات هيعود عليك أضعاف أضعافه .. لكن اصرف بحذر وبذكاء

 

بالنسبة للتسويق والمبيعات: سواء في شركات التطوير أو التسويق:

 

هنتكلم على مستوى إدارة التسويق والمبيعات: 

 

- متتوقعش إن هتحصل مبيعات كبيرة خلال اليومين الجايين .. على بال ما الناس تفوق من الخبطة دي

- ممكن تكون محتاج تطلع لشريحة أعلى من العملاء الي انت بتتعامل معاهم بالفعل .. وده معناه إنك لازم تلمع أدواتك في الإعلان أكتر وتكون مناسبة للشريحة الجديدة .. وتزود من قدرات البياعين الي بينفذوا الشغل

- لازم تزود من اهتمامك وصرفك على حملات التوعية Awareness الي بتتكلم عن العقار كاستثمار وهوضح أفكاره أكتر في كلامي مع البياعين 

- كإدارات وأفراد لازم تكون الدعم للبياعين لإنهم هم الي بياخدوا الضغط والخوف والقلق بتاع العملاء وبيتعاملوا معاه .. فلما تلاقيهم محبطين أو خايفين .. هم مش ضعفاء .. لكن بسبب ردود فعل عملائهم .. كون في ضهرهم وطمنهم .. بلاش الجو بتاع يلا بيعوا .. لو محتوتش البياعين ووقفت جمبهم مش هيقدروا يكملوا مع عملائهم ويقنعوهم

- طور البياعين طول الوقت بالتدريب والتوجيه .. ووفرلهم المعلومات والأدوات باستمرار .. البياع بينتج أكتر في بيئة الإنتاج .. وبيقل إنجازه في بيئة اللوم والخوف 

- بالنسبة لشركات التسويق العقاري .. استثمر في تسويقك أكتر على التوعية بفكرة إنك استشاري عقاري بتشغل معاه على الاختيار الأنسب .. متخليش حملاتك كلها Leads بس .. بالتالي هتقل تكلفة الـ Leads وهتزيد جودتها وهتقفل منها مبيعات أكتر

- بالنسبة لشركات التسويق العقاري .. حاول تنوع العقارات الي بتبيعها .. اهتم أكتر بالفوري وبالمناطق التقليدية زي التجمع وأكتوبر وزايد .. المبيعات فيها هتكون أحسن شويه 

 

على مستوى البياعين: 

لازم تعرف شوية حاجات عن العميل في الوضع الحالي: 

- هو مضغوط ماديا ونفسيا .. والإنسان لما يكون خايف صوت خوفه بيكون أعلى من وعودك .. مهما عملت .. عشان كده لازم توصله مفهوم إنك فاهم خوفه ومقدر قلقه .. ولازم يكون عندك صبر أكتر .. ومعلومات أكتر .. ومهارات أعلى .. واحترافية أكبر بكتير من أي وقت فات .. الوقت الي كان البياع خفيف الدم والي شكله حلو بيبيعوا .. خلاص خلص .. دلوقتي لازم تكون منظم ومحترف وحريص على مصلحة عميلك

- لازم تراعي إن المنتج وسعره .. مش هو الي هيخلي العميل يشتري .. ولا قوة المطور وسابقة أعماله وقدراته المالية والفنية .. لكن الفايدة الي هيستفيدها ونظم السداد المرنة الي هيلتزم بيها هي الي هتخليه يشتري .. وقوة المطور هي الي بتطمن العميل عشان يشتري

- لازم تقرب أكتر من العميل بشرحك للفايدة الي هيستفيدها .. لازم تخليه يتخيل حياته جوا العقار سواء سكن أو العائد الي هيعود عليه كاستثمار .. بشكل منطقي وعاطفي .. من غير أفوره .. العميل الخايف مبيسمعش كويس زي ما قلنا .. والخايف لما بتأفور بيفصل منك

- متطمعش العميل لكن طمنه .. الخايف مبيجيش بالطمع .. لكن كون انت مستشاره الي بيفكر معاه ازاي يحقق أكبر مكسب ممكن 

- علاقتك بالعميل بتبدأ من سؤاله عن احتياجاته وظروفه .. واختيارك للعقار الأنسب ليه .. وحلك لاعتراضاته بهدوء .. وانك متستعجلوش عشان يقفل .. لكن انت عايزه يفكر كويس قبل ما يقرر ويحقق مكسب أعلى 

- كل ما تكون هادي أكتر ومتحكم في أعصابك أكتر .. وكل ما تسأل أكتر .. وتسمع أكتر .. كل ما هتقدر تبيع أكتر وأسرع 

- لازم تفهمه إن شراء العقار هو القرار الأفضل دلوقتي .. للأسباب دي: 

1. انخفاض قيمة الجنيه.
2. أي استثمار غير العقار فيه خطورة كبيرة بسبب عدم الاستقرار.
3. العقار هو الاستثمار الوحيد الي تقدر تقسطه .. بخلاف اي استثمار تاني عشان تحقق منه عائد كبير لازم تحط مبلغ كبير في البداية.
4. العقار هو أفضل استثمار طويل المدى بحسب كل استطلاعات خبراء الاستثمار في العالم زي ما قال معهد Gallup العالمي.