خلى بالك من الهبد عملية البيع مش سعر وسداد وعروض !!

في هذه الكبسولة العقارية السريعة أوضح لك تفاصيل عملية البيع مش سعر وسداد وعروض!!

خلى بالك من الهبد عملية البيع مش سعر وسداد وعروض !!

مرحبا بكم في مدينه الهبد ...

مما لا شك فيه ان العاصمه اهم مشروع قومي حاليا .. عاصمة مصر الاقتصادية .. وسيتم حكم مصر من العاصمة الادارية ..ايه اللي حصل بقي ؟؟

اغلب المطورين استغلوا اهمية العاصمة وتسويق الحكومة ليها في انهم نزلوا بمشروعات بالعاصمة ادني من المستوي حرفيا ..

المطور بقي يبيع لك العاصمة قبل مشروعه ويجي عند مشروعه يعملك فيه عروض (وهميه) ... خلينا متفقين ان مكسب المطور مستحيل يكون زي مكسب الفرد .. فمتقنعنيش بالعروض اللي بتعملها اللي ظاهريا بتحسسني كعميل انك جاي علي نفسك بزياده ...

ده المنطق اللي علي ارض الواقع مستحيل يتحقق..

نيجي لمعايير قياس المشروع نفسه ..

• ميبقاش لوكاشن متدني واقل من المستوي وتقولي هتجبلي براندات.
• ميبقاش خدمات وهميه ف المبني وعايزني اصدقك.
• ميبقاش ماستر بلان سيئه وتقولي هتجبلي براندات وعيزني اصدقك.
• ميبقاش سيلز الشركة نفسها لما تسأله عن حمامات هاند كاب يقولك مش عاملينها برغم انها اشتراطات وتقولي مشروعك افضل مشروع..
• متبقاش بتستغل جهل كتير من العملاء لان ده مش مجالهم فطبيعي يكونوا ميعرفوش لا معايير ولا اشتراطات ولا معامل قياس وعيزني اصدقك.
• في العاصمة هتسمع كل اللي ممكن تتخيله قبل التسليم.
• في العاصمة ممكن تسمع من السيلز ان المول بيطير عادي جدا.
• في العاصمة هتلاقي اسعار مش هتصدقها بس قصادها هيدفعك دم قلبك في المقدم عشان يلم قسط الارض..
• في العاصمة هتلاقي اتنين قاعدين في كافيه ويتفقوا يعملوا مول ف العاصمة وتلاقيهم بيقولوا لينا سابقة اعمال في اوروبا وامريكا ودبي واي مكان متعرفش توصله عشان متشوفش شغلهم عامل ازاي ..لان ببساطة شغلهم فنكوش ولو شاطر اثبت ..
• يلموا كل المقدمات ويدفعوا قسط الارض وربنا يحلها بقي ف البناء.
• ولان دراسه الجدوي للمشروع اتعملت ع القهوه مش حاسبين ان مواد البنا غليت وانهم مش هيدفعوا مليم من جيبهم عشان حضرتك تاخد افضل تصميم ولا خدمات ده اذا استلمت اصلا ..
• عمليه الشراء ليها معايير وحسابات حققها وبعدين توكل ع الله لان الريسك هيكون اقل ..
• عمليه البيع مش سعر وسداد وعروض .. اقسم بالله في عملاء بتعيط من المشاكل اللي بتحصل معاهم والتاخيرات ..وعشان معاهم ناس معرفوش معني الضمير باعوا واختفوا فمفيش اي متابعه لا من الشركه ولا من السيلز.

في الختام...

يمكنك دائماً تصفح قسم كبسولة عقارية من يوفن دوت كوم، للإجابة علي اسئلتك العقارية سريعاً وبشكل موجز ومختصر!