النصب عن طريق الواتس اب | النصب العقاري

أحد طرق النصب العقاري عن طريق الواتس آب

للاسف النصب العقاري اصبح ظاهرة منتشرة في الفترة الاخيرة بتنوع طرقه ، وللاسف النصب بيتم في مبالغ مش قليلة ، وممكن تكون تحويشة عمر انسان ، علشان كده بنعرض النهارده حالة من حالات النصب العقاري من الواقع ، وهي حالة "نصب تحويل الاموال "، في موضوعنا عن " النصب عن طريق الواتس اب | النصب العقاري  "

نصب تحويل الأموال

النصب العقاري عن طريق الواتس اب زي ما عودناكم دايما احنا بنجيب قصص واقعية حصلت فعلا علشان الناس تاخد حذرها ومحدش يقع في فخ النصابين في المجال العقاري جبنالكم انهارده قصة حد كان هيتنصب عليه لولا ستر ربنا وهو بيقول بدون ذكر اسم

والناس أجابت وجاوبوا عليه وكانت اجاباتهم نصا كالاتي

• مودي بيقوله
  "حضرتك ازاى كنت هتحول فلوس لحد متعرفوش اصلا هو كان بيبع باسم شركه ايه."
• اما الاخ تامر بيقول
  "لازم وجود الموبايل المرسل اليه الرسائل وبيتم عمل محضر اولا بمباحث الاتصالات بأكاديمية الشرطة."
• احمد بيقول
  "اول حاجه تقول اسمه علشان الناس تاخد حذرها.. ثانيا. تقول اسم الشركه اللى بينصب باسمها وتديهم خبر بعد كده محضر نصب."
• أيمن بيقول
  "إزاي كنت هتحول لحساب الشركة وهو حساب فرد، مجرد ما التحويل يوصل لبنك المستفيد، البنك هيرفض التحويل وهيرجعه تاني بسبب عدم تطابق رقم الحساب مع اسم مالك الحساب."
• تامر رد علي ايمن وقاله
  "معظم الشركات بتعمل العقود باسم أشخاص مش باسم الشركة كشخصية اعتبارية اذا كانت شركات شغاله في فلل اًو عمارات لان الأراضي بيشتروها بتوكيلات باسم فرد مش شركة."
• سناء هي كمان ردت وقالت
  "لازم تبلغ الشركة التي ينصب باسمها وهم اكيد سيتخذوا اجراءات ضده بمساعدتك برسائل الواتس ...واحمد ربنا انك نجوت من النصب."

الإبلاغ عن النصب والاحتيال في مصر

هنا هنطرح ردود لناس فكرت بمنطقية ازاي تبلغ :-

• محمد كان رده قاسي شوية وقال
  "انت غاوي يتنصب عليك بقي طالما مفيش ضرر يبقي مفيش قضيه.
  ومفيش حاجه اسمها شروع في نصب  لو كنت حولت الفلوس كان من حقك تعمل محضر.
  احمد ربنا ووفر فلوسك لكن لو عايز تضره بلغ الشركة وابعتلهم الرسايل وهما من حقهم يرفعوا قضيه عليه استغلال اسم."
• شادي شكله محامي رد وقال
  "عرفت المادة 45 من قانون العقوبات الشروع بأنه البدء في تنفيذ فعل بقصد ارتكاب جناية أو جنحة إذا أوقف أو خاب أثره لأسباب لا دخل لإرادة الجاني فيها، و يفترض المشرع الشروع في النصب إتيان الجاني عملا يعد بدءا في تنفيذ الجريمة ثم يتخلف النتيجة الاجرامية لسبب خارج عن إرادته في الشروع يتحقق بكل فعل يؤدي حالا ومباشرة إلى ارتكاب الجريمة وقد عبر الشارع عن الشروع في النصف بقوله في عجز الفقرة الأولى من المادة 336 "أما من شرع في النصب ولم يتممه."
• وبيكمل شادي كلامه
  "عاقب المشرع علي الشروع في جريمة النصب بالحبس مدة لا تتجاوز سنة "المادة 336/2" ولم يفرق المشرع بين الشروع والجريمة التامة من حيث العقوبة التكميلية الجوازية فيجوز وضع المتهم تحت مراقبة الشرطة لمدة لا تقل عن سنة ولا تزيد عن سنتين في حالة العود.
  حضرتك ده وفقا للمادة رقم 157 لسنه 2018، يعاقب بالحبس كل من استخدم الشبكة المعلوماتية أو إحدى وسائل تقنية المعلومات، فى الوصول بدون وجه حق إلى أموال في اكتر من مادة ممكن يتحاكم علي اساسها."
• رد عليه محمد وقال
  "يا بيه الشروع هنا المقصود به القبض علي المتهم قبل اتمام الجريمة بتوافر اركان جريمة النصب اركان جريمة النصب مش متوفرة اساسا.
  دي اخرها لو كان بعت الفلوس هيرفع اثراء بلا سبب لو حضرتك محامي كنت فهمت انا اقصد ايه."

سؤال وقصة واقعية عن عدم التزام شركة عقارية بالتسليم طبقا للعقد

• حسام رد رد غريب
  "ده ممكن القاضي يقولك يعني ايه واتس اب.
  احمد ربنا ان فلوسك معاك .. بس نزل اسمه وصورته ورقم تليفونه لتحذير الناس منه."

ماذا تفعل إذا نصب عليك شخص

ودي اراء بعض الناس في قضية النصب اللى عرضناها  من - النصب عن طريق الواتس اب | النصب العقاري  - و ازاي تتصرف في موقف زي ده :-

• ابراهيم اقترح وقال
  "بلغ الشركة الي بيبيع بإسمها و هي هتاخد ضده الاجراءات القانونية اكيد مش هيسبوه."
• زينب كانت عايزة تنتقم من المتهم وقالت
  "انت ممكن تاخد حقك بطريقة تانيه، تنزل صورته واسمه وتفضحه وهيبقي زي الجزمة مش هيقدر يفتح بقه لان انت اللي معاك الدليل ومش هيعرف يكذبك وكده هيتربي تمامً والناس تتقي شره."
• أحمد قال
  "قول للمحامي يقدم بلاغ في النيابة العامة وهي تجيبه وتحقق معاه ومعاك اون لاين عن طريق الزووم وده متوافر -والنيابة هي الي حتقرر اذا كان هو نصاب والا لا وله عقوبة والا لا؟."

وناس كتيير طلبوا ان الراجل ياخد اجراء ضد المتهم باسرع وقت ممكن علشان المتهم مينصبش علي ناس تاني

• بيتر شكله محامي ولا قاضي قال
  "جريمة النصب كما هي معرفة في المادة۳۳٦ من قانون العقوبات تتطلب لتوافرها أن يكون ثمة احتيال وقع من المتهم علي المجني عليه بقصد خداعه والاستيلاء علي ماله فيقع المجني عليه ضحية الاحتيال الذي يتوافر باستعمال طرق احتيالية أو باتخاذ اسم كاذب أو انتحال صفة غير صحيحة أو التصرف في مال الغير ممن لا يملك التصرف.
  رأي الشخصي حرر توكيل لمحامي يقوم بعمل محضر نصب علشان تحمي غيرك من التعامل مع ذلك النصاب."
• محمد لخص الموضوع وجاب من الاخر وقال
  "أيوة طبعا ممكن.. لو معاك رقم تليفونه و رقم الحساب باسمه و فعلا في رسائل و هو بينصب باسم الشركة الكام شغال فيها.. لازم يكون في ضرر علشان هو يتحاكم.. إنت هتعمل توكيل من الخارج لمحامي في مصر بدون ما تنزل.. و المحامي يظبط مع الشئون القانونية في الشركة و يعملوا محضر مزدوج هما فيه طرف مع بعض ضد الواد يرتبوا للواد كمين حلو و يتجاب و الحكومة تشوف شغلها."
• رامي دخل علي الخط وقال
  "اللي بيقول لا قضية بدون وقوع ضرر كلام مش مظبوط لانه قانون حماية مكافحة جرائم تقنية المعلومات رقمً ١٥٧ لستة ٢٠١٨ بينص علي ان كل من استخدم الشبكة المعلوماتية أو إحدى وسائل تقنية المعلومات، فى الوصول بدون وجه حق إلى أرقام أو بيانات أو بطاقات البنوك والخدمات أو غيرها من أدوات الدفع الإلكترونية.
  فإن قصد من ذلك استخدامها فى الحصول على أموال الغير أو ما تتيحه من خدمات، يعاقب بالحبس مدة لا تقل عن 6 أشهر وغرامة لا تقل عن خمسين ألف جنيه ولا تجاوز مائة ألف جنيه، أو بإحدى هاتين العقوبتين
  وتكون العقوبة الحبس مدة لا تقل عن سنة، والغرامة التى لا تقل عن مائة ألف جنيه ولا تجاوز 200 ألف، أو إحدى هاتين العقوبتين، إذا توصل من ذلك إلى الاستيلاء لنفسه أو لغيره على تلك الخدمات أو مال الغير.
  هنا القانون بيتكلم عن القصد للحصول علي أموال بدون وجه حق اًو الاستيلاء علي أموال الغير."
• وائل بيقول "لابد نتعلم من هذه الواقعة  مافيش حاجة اسمها تحويل الا لما تروح بنفسك الشركة او ترسل احد من اهلك ولابد تكون شركة كبيرة ومحترمة."

اقرا ايضا   نصائح عند شراء شقة تمليك

اقرا ايضا  شراء شقة تمليك بدون حصة في الأرض اضراره وتوابعه

وفي النهاية نترك لحضراتكم التعليق وكونو حذرين

وتقبلوا تحياتي

سعودي السيد

موقع يوفن دوت كوم ( قريبين منك )